చేఎత్తి జే కొట్టు తెలుగోడా , గతమెంతో ఘనకీర్తి గలవోడా .. అనే ప్రబోధ గీతం తో ఒకనాడు నిద్రాణస్థితి నుండి మేల్కొన్న జాతి , ఆత్మ గౌరవనినాదంతో కదం తొక్కిన తెలుగు జాతి విభజనతో దగాపడితే ఆత్మవిశ్వాసం కలిగించి అభిమానంతో ఆప్యాయంగా అక్కున చేర్చుకొన్ననేలఅమరావతి. ఇది బుద్దిమాధవ్యం గలవారికి భ్రమరావతిగా కనిపించవచ్చు.అలాంటి వారి భ్రమలు తొలగి సౌమ్య అమరావతిగా నూతన తేజస్సుతో నవ్యఆంధ్ర రాజధానిగా అవతరిస్తుంది. ఆంద్ర జాతి ఉన్నంతవరకు అమరావతి శాశ్వితంగా ఉండటానికి ఉపకరిస్తున్న అనేక సాంఘిక, ఆర్థిక కారణాలతో పాటు రాజకీయ, నైసర్గిక, నైతిక విషయాలు ప్రస్తావించుకుందాం.
1. రవాణా సదుపాయాలు
a) విజయవాడ లో 1888 లో ప్రాంభించబడి దాదాపు 132 సంవత్సరాల నుండి సేవలందిస్తున్న అతి పేద్ద రైల్వే కూడలి ఉంది. 22 ట్రాక్స్ తో ,10 ఫ్లాట్ ఫార్మ్స్ నుండి ప్రతి రోజు 1.5 లక్షల ప్రయాణికులకు సేవచేస్తూ దేశంలోనే 4వ అతి పెద్ద స్టేషన్ గా విలసిల్లుతుంది.
b) రెండవ ప్రపంచ యుద్ధ సమయంలో సైనికులకు సేవలందించి 2003లో పౌర విమానాశ్రయంగా మారి దినదినాభివృద్ధి చెందుతున్న గన్నవరం విమానాశ్రయం జోడవటం అమరావతికి కలిసివచ్చిన అంశం.
c) జాతీయ రహదారులు NH - 16,( చెన్నై-కలకోత్త) NH -65 (మచిలీపట్టణం-హైదరాబాద్) తో పాటు NH-30 ( ఛత్తీస్ గడ్ - విజయవాడ) ఉండటంతో అమరావతికి అన్ని ప్రాంతాలతో అనుసంధానం వచ్చింది.
d) చౌకైన జల రవాణాకు కృష్ణ నది, బకింగ్ హమ్ కాలువ , మచిలీ పట్నం పోర్ట్ లు కూడా అనువుగా ఉన్నాయి.
ఇలా ఒక కొత్త నగరాన్ని దేశంలోని వివిధ ప్రదేశాలకు అనుసంధించాలంటే చాలా ఖర్చుతో రహదారులు నిర్మించాలి.
2. నీటి వసతి
1855 లో కృష్ట్ణ నదిపై కట్టిన ఆనకట్ట తిరిగి 1957 లో పునర్మించిన ప్రకాశం బ్యారేజ్ వల్ల కృష్ణ డెల్టా లో 12 లక్షల ఎకరాలకు సాగునీరు, విజయవాడ, గుంటూరు, మంగళగిరి,తెనాలి వంటి అనేక పట్టణ ప్రాంతాలకు, గ్రామాలకు తాగునీరు అందిస్తున్నది. తీవ్ర వర్షాభావ పరిస్థితులలో కూడా నీరు సమృద్ధిగా లభించటానికి గోదావరి జలాలను తరిలించే పట్టిసీమ ప్రాజెక్టు ఉంది. ఇలా జీవనదులైన కృష్ణ గోదావరి సుజలాలతో నూతన రాజధాని అమరావతికి ఆచంద్రతారక్కం నీటి కొరత రాదనీ ఘంటాపధంగా చెప్పవచ్చు.
3. స్థల సమీకరణ
సంవృద్ధిగా నీరు, చక్కటి రవాణా సౌకర్యాలతో ఉన్నచోట 2013 భూసేకరణ చట్టం ప్రకారం రాజధానికి కావలిసిన భూమిని సేకరించటం బహు కష్టసాధ్యమైన విషయం. దానిని సుసాధ్యం చేస్తూ ఈ ప్రాంతంలో 29 గ్రామాల్లోని రైతులు స్వచ్చందంగా భూ సేకరణ పద్దతిలో 33 వేల ఎకరాల భూమిని ప్రభుత్వానికి ఇవ్వటం ప్రపంచ చరిత్రలో ఇదే ప్రధమం. వారి స్ఫూర్తికి, త్యాగానికి, విశ్వాసానికి, అభిమానానికి విలువకట్టటం క్షమార్హం కాదు. ఈ స్థితిలో రాజధానిపై పునరాలోచనలు సహేతుకం కాదు.
4. కేంద్ర బిందువు
ఈనాడు 13 జిల్లాలతో ఉన్న నవ్యఆంధ్ర రాష్ట్రం లో అమరావతి రాష్ట్రానికి నడి బొడ్డున గుంటూరు జిల్లాలో ఉంది. దీనికి ఉత్తరాన 6 జిల్లాలు దక్షిణాన మరో ఆరు జిల్లాలు ఉన్నాయి. ఒక కొసనున్న శ్రీకాకుళం నుండి 470 కిలోమీటర్ల అయితే మరొక కోసనున్న అనంత పురం నుండి 450 కి. మీ. దూరంలో ఈ రాజధాని ఉంటుంది. 2011 జనాభా లెక్కల ప్రకారం మన రాష్ట్ర జనాభాలో దాదాపు 30 శాతం ప్రజలు రాజధాని ప్రాంతానికి చుట్టుపక్కల ఉన్నారన్న సంగతి గమనార్హం. విజయవాడ, గుంటూరు మునిసిపల్ కార్పొరేషన్స్, తాడేపల్లి, మంగళగిరి మునిసిపాలిటీలు నూతన రాజధానిలో ప్రచ్ఛన్న పరిధిలోనే ఉన్నాయి.
5. నగర ప్రణాళిక
అద్భుతమైన హరిత- నీలి ప్రణాళికతో, రాగాల 50 ఏళ్ళ అవసరాలను దృష్టిలోనుంచుకొని సింగపూర్ ప్రభుత్వ సహాయ సహకారాలతో రూపు దిద్దుకున్న మాస్టర్ ప్లాన్ అనేకమంది సాంకేతిక నిపుణుల ప్రశంసలు పొందాయి. క్రమబద్ధంగా,కళాత్మకంగా, కమనీయంగా ఉన్న కట్టడాలు, పర్యావరణ హితంగా, పర్యాటక ప్రదేశంగా ప్రపంచ ప్రసిద్ధి చెందేలా ఉన్న ఈ నగర ప్రణాళిక మార్చటం మంచిదికాదు. ఇది ఒక్క రోజుతో పూర్తి అయ్యే పనికాదు. దీర్ఘకాలం పట్టే నిర్మాణంలో కురచ ఆలోచనలు, కుచ్చిత పనులు జాతి ప్రగతిని అడ్డుకుంటాయి.
6. ఆర్థిక వనరులు
గెలుపు - గెలిపించు పద్దతిలో సమీకరించిన భూమి అభివృద్ధి చెందితే ఇచ్చిన రైతులకు, తీసుకున్న ప్రభుత్వానికి ఆర్థిక లాభం కలుగుతుంది. దీనికి ప్రభత్వ ధనం పెద్దగా అవసరం లేదు. అన్ని వర్గాలకు ఆవాసంగా ప్రజా రాజధానిగా రూపాంతరం చెందవలిసిన అమరావతిపై కుల/ప్రాంత ముద్రవేసే మాటలు తగదు. అమరావతిపై అసూయా, ద్వేషం పెంచటం జాతి ద్రోహం. సాంకేతిక విషయాలలో అవగాహన లేకుండా అవాకులు చెవాకులు వాగటం సరికాదు.
పెద్ద మనుషుల ఒప్పందం పేరుతో 1953లో దగాపడి ఒక్క ఓటుతో విజయవాడ లో ఉండాలిసిన రాజధాని కోల్పోయిన ఆంధ్రజాతి తిరిగి 66 ఏళ్ల తరువాత మరోసారి అమరావతికి చేరటం ఆంధ్రుల అదృష్టంగా భావించాలి. చేతికి వచ్చిన అన్నాన్ని కాలితో తన్నకండి. అమరావతి నిర్మాణాలను కొసాగించండి. అమరావతిలో రాజధాని ఉండటం వాల్ల రాష్ట్రం మొత్తానికి లాభమే కానీ ఏ ప్రాంతానికి నష్టం వాటిల్లదు. వికేంద్రీకరణ పేరుతో రాజధానిని చిన్నాభిన్నం చేయటం విజ్ఞత కాదు.ఆంధ్రులు ఆవేశపరులే కానీ ఆలోచనా శున్యులు కారని వెలుగెత్తి చాటుదాం. కుల, మత, ప్రాంత రాజకీయ భేదం లేకుండా ఐక్యత చాటుదాం. అమరావతి అందరిదీ అని ప్రకటిద్దాం. (సశేషం)
ఆచార్య కొడాలి శ్రీనివాస్
Comments